LIC GJF Scholarships 2023 Notification Released APPLY Now

LIC GJF Scholarships 2023 Notification Released APPLY Now

LIC GJF: పేద విద్యార్థులకు వరం.. ఎల్‌ఐసీ గోల్డెన్‌ జూబ్లీ స్కాలర్‌షిప్‌

ఆర్థికంగా వెనుకబడిన ప్రతిభావంతులైన విద్యార్థులను ఉన్నత చదువులకు ప్రోత్సహించేందుకు ఎల్‌ఐసీ స్కాలర్‌షిప్‌లు అందిస్తోంది. ఇందుకోసం దరఖాస్తులు ఆహ్వానిస్తోంది.

Golden Jubilee Scholarship Scheme- 2023 | ఇంటర్నెట్‌ డెస్క్‌: ప్రతిభ కలిగిన విద్యార్థుల్ని ప్రోత్సహించేలా భారత జీవిత బీమా సంస్థ (LIC) అపూర్వమైన సహకారం అందిస్తోంది. ఆర్థికంగా వెనుకబడిన కుటుంబాలకు చెందిన విద్యార్థుల ఉన్నత చదువులకు ఎల్‌ఐసీ సిల్వర్‌జూబ్లీ ఫౌండేషన్‌ (LIC GJF) భరోసా కల్పిస్తోంది. అర్హులైన విద్యార్థుల నుంచి ‘ఎల్‌ఐసీ గోల్డెన్ జూబ్లీ స్కాలర్‌షిప్‌-2023’కు https://licindia.in/ ఆన్‌లైన్‌ ద్వారా దరఖాస్తులు ఆహ్వానిస్తోంది. అర్హులైన విద్యార్థులు జనవరి 14 వరకు ఆన్‌లైన్‌లో దరఖాస్తులు చేసుకోవచ్చు.

ఎవరు అర్హులు?

పదో తరగతి లేదా ఇంటర్మీడియట్ విద్యను 2022-23 సంవత్సరానికి పూర్తి చేసుకున్న విద్యార్థులు ఈ స్కాలర్ షిష్‌న‌కు అర్హులు. గుర్తింపు పొందిన విద్యా సంస్థల్లో కనీసం 60 శాతం మార్కులు సాధించి ఉండాలి. ఇంటర్ ప్రథమ, ద్వితీయ సంవత్సరం, ఐటీఐ, డిప్లొమా, పాలిటెక్నిక్, ఏదైనా ఒకేషనల్ కోర్సులు చదువుతున్న విద్యార్థులూ దరఖాస్తు చేసుకోవచ్చు. కుటుంబ వార్షిక ఆదాయం రూ.2.5లక్షలు మించరాదు. వితంతువు/ఒంటరి మహిళలైతే కుటుంబ వార్షికాదాయం రూ.4లక్షలు మించరాదు.

స్పెషల్ గర్ల్ చైల్డ్ స్కాలర్‌షిప్‌ స్కీమ్ కింద దరఖాస్తు చేసుకోవాలనే విద్యార్థినులు 2022-23 సంవత్సరానికి పదో తరగతిలో కనీసం 60 శాతం మార్కుల‌తో ఉత్తీర్ణత సాధించి ఉండాలి. ఇంటర్మీడియట్ లేదా 10+2లో చేరాలనుకునే వారు మాత్రమే దరఖాస్తు చేసుకోవాలి. యూజీ కోర్సులకు మాత్రమే ఈ ఉపకార వేతనాలను అందిస్తారు. పీజీ కోర్సులకు ఇవ్వరు.

ఎంతమందికి ఇస్తారు?

దేశవ్యాప్తంగా ఒక్కో ఎల్ఐసీ డివిజనల్ సెంటర్‌కు 30 మందిని షార్ట్‌లిస్ట్‌ చేస్తారు. వీరిలో 20 మంది (10 మంది బాలురు, 10 మంది బాలికలు)ని జనరల్‌ స్కాలర్‌షిప్‌నకు; అలాగే, అర్హులైన మిగతా పది మందిని స్పెషల్‌ స్కాలర్‌షిప్‌ ఫర్‌ గర్ల్‌ చైల్డ్‌కు ఎంపిక చేస్తారు.

ఎంత మొత్తం ఇస్తారు?

జనరల్‌ స్కాలర్‌షిప్‌నకు ఎంపికైన విద్యార్థులకు మెడిసిన్‌ చదువుతున్న వారికైతే అర్హతలకు లోబడి ఏటా రూ.40వేలు ఇస్తారు. మూడు విడతలు (రూ.12000; రూ.12000; రూ.16000) చొప్పున ఈ మొత్తాన్ని విద్యార్థి బ్యాంకు ఖాతాలో నేరుగా జమ చేస్తారు. ఇంజినీరింగ్‌ విద్యార్థులైతే ఏడాదికి రూ.30వేలు ఇస్తారు. ఈ మొత్తాన్ని మూడు విడతల్లో (రూ.9000; రూ.9000; రూ.12000) చెల్లిస్తారు. గ్రాడ్యుయేషన్‌, ఇంటిగ్రేటెడ్‌ కోర్సులు, డిప్లొమా, వొకేషనల్‌ కోర్సులు చేసేవారికైతే ఆ కోర్సు పూర్తయ్యేవరకు ఏటా రూ.20వేలు చొప్పున ఇస్తారు. ఈ మొత్తాన్ని మూడు విడతల్లో (రూ.6000; రూ.6000; రూ.8000) బ్యాంకు ఖాతాల్లో జమ చేస్తారు.

స్పెషల్ గర్ల్ చైల్డ్ స్కీమ్ కింద ఎంపికైన విద్యార్థినులకు ఏడాదికి రూ.15వేలు చొప్పున ఇస్తారు. పదో తరగతి పూర్తయిన తర్వాత ఇంటర్‌, వొకేషనల్‌/డిప్లొమా కోర్సులను పూర్తి చేసేందుకు ఈ మొత్తాన్ని మూడు విడతల్లో (రూ.4500; రూ.4500; రూ.6000) చెల్లిస్తారు.